poems by Irish Colon of BSEd IV - English

Ang Daob

Ikaw midilaab tungod sa sugnod nga sagay
Giubanan pa gyud ug inanay nga pagpaypay
Apan hangtod kanus-a man kaha ikaw magsiga?
Magpabilin ka pa kaha kung ang sugnod upos na?

Gibantayan ko ang imong pagsiga
Uban sa panghinaot nga sa pagkapalong modili ka
Kay kanang imong kahayag mao'y bugtong paglaom
Aron ni'ng kinabuhi, ako magpadayon

Apan sa wala ko lang damha akong nabatyagan
Nga ang imong siga aduna na'y kausaban
Ako nabalaka kung ngano naunsa ka
Nga unta sa kanunay sinugnuran ka

Sa paggakos sa hangin ikaw mikalma
Sa iyang kusog nga uros ikaw nagpadala
Taliwala sa kainit, iyang kabugnaw mipatigbabaw
Ug ikaw mi-awop - milimot na sa pagsiga

Sa imong mga aso ako nalang nahibaw-an
Sa kusog nga hangin kalit ikaw niuban
Ikaw napalong ug nawagtangan ug kainit
Imong gidala ang tanan nga wala gani'y panamilit


Bolpen

Lupad, bolpen, lupad!
Lupad gyud hangtod di na tika makab-ot
Itugpo tika, ayaw baya ka-ugbok ha?
Basi'g mokalit lang ka'g lukapa

Dagan, bolpen, dagan!
Apsa ug unhi silang tanan
Ipaligid tika, ayaw baya'g kasangit ha?
Suway bitaw'g mo-ungot ka!

Kamang, bolpen, kamang!
Inanayng hagki ang linya sa akong papel
Kuptan tika, ayaw baya'g dagan ha?
Suway'g moikyas ka!

Karon bolpen, duslaka
Ang taw'ng wala gyud ko taga-i'g importansya
Ayaw'g kabalaka, tudlu-an tika kung kinsa
Pikasa ug patya ang iyang kasing-kasing ha?
Susama sa iyang pagpikas ug pagpatay sa akong gugma.


Pultahan

Nagkadaiya lang ang pultahan sa kalibutan
Ikaw na ang bahala sa gusto nimong sudlan
Aduna'y pultahan nga dako; aduna sa'y gamay
Aduna'y nagpanawag sa kanindot; duna sa'y sa kagamay gitamay

Apan kung asa ka gusto mosulod
Imuha na kanang katungod
Ang importante nga sa imong pagpili
Ikaw magmalipayon ug magmakanunayon

Apan ako kanimo nagpahinumdom lang
Nga kung ikaw mamili, taronga lang
Kay basi'g ang kanang kanindot, usa lamang ka lingla
Nga sa tibuok nimong kinabuhi, magmahay ka


Heart

I try not to listen
I try not to feel
I try not to ponder
The words that you whisper

How can I neglect you?
How can I ignore you?
How can I deny
If all you say is true?

I know
That what you sing is what I feel
I know
That what you praise is all I ever wanted

But how will I follow you
Or even give my trust to you
If sometimes, what you whisper
Is not what is fair?

How I wish you weren't there
Or wish you didn't exist
So that I can make decisions
Without morbid agitation